PIANZAN ATRAVERSO I SO BAR

In rigoroso ordine sud-nord par no far torti a nessun ve presenten la storia dei bar del nostro paese che come che vedè ghe n’era almanco un par chilometro!

 

BAR DALA TERESINA

b8
Partin dall'estremo sud e chi che rivea da Codognè al podea subito disetarse dala Teresina, al bar che se trovea poc dopo la ceseta dela Levada da chealtra parte dela strada.

Vicin al bar ghe n'era al casolin.

A 28 Risto&Caffè

 BraNovo
Finalmente in tela primavera del 2012 verde un novo bar a Pianzan!

Se trata de un bar a servizio dela nova stazion par far benzina tra Levada e Baver, oltre al bar pense che i fae anca qualcosa da magnar.

 

BAR BAVER

b7
Senza tanti dubi, al bar pì vecio de Pianzan, ativo già in tel 1600 quando se ghen sente parlar par qualche episodio de barufe e cortelade, a quei tempi e fin a 100 ani fa o manco, l'avea un bus sul canton da drio da dove pescar sul poz de Baver che l'e ancora al so posto e che sembra che già al fuse in tel 1200.

  

b9
Sul davanti no l'era come 'des, l'avea un porticato coi archi che dopo l'e stat serà par sgrandarlo, a fianco l'era al dogo dee bale come ogni bar serio che se rispete.

L'avea anca al casolin.

In te sta foto dela colezione de Azalini se vede al bar come che l'era.

  

Ormai l'e serà da tant e volaria adiritura butarlo do...

BAR DA BRUNETTA

b3L’era al vero e proprio bar del paese, tacà ala cesa nova. De fora al vea ‘na frasca de vide sul davanti (forse Clinton o roba del genere) e in istà i metea in bela mostra ‘na brenta gigantesca e piena de acqua co drento le angurie in fresca, l’acqua i la portea col goma (rossa scuro co le strise blu) e la molea fin che la pasea fora e la corea par tut al curtivo, sula sinistra l’era al dogo dele bae che tanti ani fa l’era tant frequentà, i vegnea fin da fora.

Dentro l’era picolet, col bancon longo subito a destra e di fronte te avea al specio grando inclinà come tuti i bar che se rispete.

I lo ciamea anca bar mosca come par dir che no ‘l fose tant net...ma ve pareo???? Al di de incò sen stufi dei Lunge bar, happy hour, drink corner e monade del genere, dove che i me porta biceri grandi come mastele che i se rompe solche a vardarli e dopo i me buta dentro na lagrema de vin trist.

Mejo tornar ai bar come si deve che i te servia al vin sul goto de viero e prima de dartelo i lo sufiea e i ghe dea ‘na pasada cola canvaza ‘pena usada par netar al bancon de aciaio inosidabile, e po basta coi vin strani (Amarone vermoso dei colli Castracazzi, Bianco dei conti Fufighe....) ‘na volta era sol BIANCO o NERO e de sicuro no i savea da aromi fruttati, mandorle, retrogusti di frutti di bosco era vi che savea da vin.

Quando che i lo ha demolì, ala sera, durante un concerto dei Puerto Galera l’e stat fat un minuto de silenzio: quanti dei presenti i era stati la a ciorse le ciche de scondion dai soi....

Sule so ceneri i a fat su un palaz col bar al piano terra che ne la prima gestione al se ciamea BIG BANG (dopo PEPERONCINO ROSSO), ormai l’e deventà un abituale punto de ritrovo par la gioventù pianzanese.

 BAR ENAL

b11
Col crolo del Fascismo se ha sgrtolà anca quel che l'era al "Dopolavoro" (OND), ma subito, in tel '45 vien fondà l'ENAL che l'avea grosso modo le stesse funzion, magari un pò manco politiche!

Anca a Pianzan avensi l'ENAL e par esser discontinuo col fascio i ghe a dat nantra sede, ossia vizin ala cesa nova.

Al Bar ENAL (gestion Buttazzi) l'e stat attivo almanco fin ai ani '70 e l'era pì vecio del bar da Brunetta, ma mancando al dogo dele bale questa l'era 'na pecca massa grossa...In te quel periodo l'ENAL al vien sopresso in Italia e le funzioni le vien ciapade alle ASL, resta solche al nome del dogo tra i pì famosi specie de sti ani: l'ENALOTTO.

  

BAR PIZZERIA ITALIA

b5
Vicin ala stazion 40 ani fa ia pensà ben de costruir 'na specie de centro comerciale, co negozi, distributor, apartamenti e...bar oviamente!

La Pizzeria Italia l'e stata una dele prime pizerie de paese che ghe n'era nei dintorni, nei ani '80 l'era cussì famosa che l'era fadiga trovar posto, anca parchè l'era davero bona (anca ades), ma noantri ne interesa al piano de sora dove che le 'l bar.

In sostanza l'e restà sempre compagno col gran bancon in medo e i tavolin a torno

b12
Al tempo del Fascio ghe n'era un altro bar proprio dentro al Dopolavoro del Fascio che se pol veder su sta foto dell'epoca, l'era dove che ades l'e la Pizzeria Italia. A sinistra l'e l'albero piantà par celebrar la marcia su Roma che l'e mort poc temp fa e che l'era tacà ala cabina del telefono.

BAR GELATERIA ALLA STAZIONE


b13Sto bar al sarà vecio almanco come la stazion de Pianzan (l'era usanza che su ogni stazion ghe fuse un bar tacà), ma al stabile de des l'e de 30-40 ani fa.

In origine al bar l'era pressapoc dove che ades l'e le poste, quando che i fat al stabile novo al bar al se a spostà, in te la foto se vede al vecio Ufficio Postale con la osteria di Gigio Freschet e negozio alimentari (coloniali) gestì dala fia Angelina .

    

   

    

b6In tempi recenti l'e stat quasi sempre 'na gelateria, ma no l'e mai decolà come che se deve finchè l'e rivà Andrea a gestirlo come Dio comanda, lo a modernizà come se deve co la television par le partide e i doghi sul piano de sote (Biliardo, doghi da tavol, videogiochi, ecc...), po l'organizea sempre serate a tema o de musica dal vivo: inutile dir che l'era sempre pien come un ovo.

Dopo de la so gestion ghe ne sta altre, ma gnent pì a che veder! Ades l'a vert 'nantro locale sul confin co Godega tacà a dove che l'era a Manhattan, vert da poc, ma se vede già la bona impronta del paron.

  

  

  

       

 

BAR EDICOLA

b2
Te mete al piè fora dala gelateria e te sì dentro a ‘nantro bar, al se ha sviluppà co la gestion de Giussani e subito dopo co quea de Bruno che l’ha lancià alla grande al posto anca coi doghi del Totocalcio e soprattutto dei cavai, al vea fin mes ‘na television par veder le corse dei cavai in direta, par no parlar dei sistemi par la tris che ogni tant i ciapea qualche bon scheo. Coa nova gestion l’e stat rinovà ancora i locai e sistemà anca la parte fora, L’e importante parchè l’e l’unica edicola del paese, cossa eo de mejo che la domenega mattina con gazzetta+tex+caffè correto stravecchia?

Roba da intendintori.

Ultimamente l’e sistemà che co te entra te ha al bancon sula destra e i giornai sula sinistra, in fondo te ha un per de tavolin par chi che vol far un scarto in pace.

 BAR PASINI

b10
Tacà al ferovia in borgo Pasini l'era un bar col casolin e anca maceleria, durante la guera l'e stat bombardà e mai pì ricostruì. Ades l'e ristturà e deventà 'na casa.

Vicin però l'a vert la botega de Pradela che l'e stata verta fin in tei ani '80.

 

BAR DALA ROSY

b4
Un dei bar numero 1 de Pianzan, al bar l'e vert da almanco 30 ani se no de pì, penseve che nei ani 60-70 l'era un locale par i doveni, infati al piano de sote i organizea feste da balo ana co musica dal vivo, coi primi complessi de Pianzan come i "Albatros" o "La Fusione", senza contar l'imancabile j.box che fin a pochi ani fa te lo vedea ancora sul sotoscala.

Co l'andar dei ani al bar l'e deventà famoso par chi che vea pasion de dogar a carte, medo local l'era impenì de tavoi verdi par dogar e i vegnea fin da fora, le machine i le parchegea drio la strada fin quasi ale 4 strade.

Dopo le cambià un poche de gestion, i a provà a far qualcosa de diverso adiritura a cambiarghe nome (sacrilegio), ma solche ultimamente, riscoprendo al vero scopo del bar tradizionale l'e tornà ad ingrumarse le machine.

Ades i fa anche da magnar, sia menù fisso a miodì che qualcosa di particolare de sera, sempre molto bon a dir al vero.

Coi ulltimi lavori i a tegnest un pochi de tavoi sul davanti e de fora par al bar e sul da drio l'e al salon par chi che deve magnar, al bancon sul davanti l'e ancora quel originale.

BAR AL CACCIATORE

b1
L’era un bar vizin ale 4 strade dove che ades l’e un laboratorio par al restauro mobili: no l’ha mai avù una grossa fortuna e dopo un per de gestioni l’e stat serà, ormai sarà 20 ani.

Co te ndea dentro l’avea al bancon di fronte, mentre a destra e anca sul davanti l’avea tuta ‘na serie de tavolin e qualche videogioco, forse i vea mes anca un biliardo in tei ultimi periodi