ATILA PASA PAR PIANZAN

ciacol1In tra tuta la dent che l'é rivada qua a Pianzan, de sicuro no podea mancar al pi importante re dela pi tremenda popolazion de barbari. E difati Atila, re dei Unni e frajelo del Signor l'é passà par la Levada e 'l se à anca fermà a bever na ombra in te l'ostaria dela Teresina, anca se a chei ani là ancora no la era ela che la portea fora goti e butiglion. La vecia ostaria dela Teresina se pol vederla ancora ades in tel centro dela Levada, cusita come che a destra dela so porta se pol veder ancora ades l'anel picà su par al muro (in figura) dove che Atila l'à ligà al so caval chela volta là. Comunque l'é da dir che al vin dela Teresina al vea da eser proprio bon se un come Atila l'à fat tuta chela strada là sol che par beverghen na ombra.

Alcuni i dis anca che Atila co le passà pal Campardo l'abie fondà la fiera de S.Urban: l'ha distruto medo mondo e l'unica roba de bon che l'a fat l'ha fata qua a Pianzan.

I FRATI DE PIANZAN

ciacol2Da fonti sicure (na siora che la sta là a do pas) ven savest che na ciacola che ormai la gira par Pianzan da qualche diesina de ani, no la é altro che verità pura: na volta, vizin ala ceseta dee campanele (che la é in tea parte basa dela contrada de Levada-Baver) no ghe n'era gnent altro che un convento (in figura). Par provar sta roba l'é da dir che ani e ani fa, quande che sta siora, apena maridada, l'é 'ndata a star proprio in te quel che l'era stat al vecio convento,  la trovà che la scala par 'ndar su de sora la vea tuti i scalin consumadi. Cusi la à domandà: "Come ela come po'  qua che la casa la é quasi nova e le scale le é tute frugade?" E i ghe à rispondest: "Siora na volta qua ghe n'era i frati, i é stati lori a forza de 'nadar su e do". E cusi l'é grazie a sto scambio de parole che ades saven che no l'é vero gnent tut quel che i à dita dent studiada e esperti de storia a proposito de sta roba. LEVADA9

 

Tuti i scriti e le pagine de storia locale che i dis che là ghe n'era sol che do preti (che i vea da dir mesa in e la ceseta) no  i è altro che bale, bale grande come na casa.

Penseve che ven fin trovà la letera de fondazione de la cesa de S.Giovani e ancora inco ghe n'e storici locali (i dis lori de essere storici) che i publica libri disendo che la cesa la e vecia anca prima del mile, che ghe n'era i frati e tante ciacole del genere.

 PIANTE DE VIDE IN ZIMITERO

 

ciacol3Prima  che 'l zimitero al fose spostà drio  l'oratorio de Sant' Urban (pi o manco sul finir del 1800) a l'era proprio tut atorno ala cesa vecia vecia de San Lorenzo, e  un prete de Pianzan de chei ani là ghe à saltà par la testa de far qualche ato strano. No se sa parché o par come, o se par caso la sie stata par via che al vin che al bevea a past e a dir mesa no l'era tant bon, comunque al ghe n'à fat una dele soe: al se a mes a piantar vit rento al zimitero. L'andea vanti sempre galivo: na riga de morti e na pianta de vit, na riga de morti e na pianta de vit; e par forza che le vit le vegnea bele smorvede e che la ua e al vin i era boni, co tut quel che le era coltade no podea eser altro che cusi. Fin pecà che un dì sie rivà al vescovo e che al ghe epie fat tirar via tut quant dala prima a l' ultima pianta; de sicuro a sto vescovo al vin no 'l ghe piasea.

 

 AL SAC PIEN DE SCHEI

 

ciacol4
Dopo le do guere se à difondest na legenda che la dis che i soldadi tedeschi i varie abandonà un sac pien de monede in te na colona de na casa vecia de Pianzan (in figura). No se pol dir co sicureza se le vero o no de sicuro però no le na legenda metropolitana parchè Pianzan la sol che 3000 abitanti.

 

 PATATE O CESA NOVA?

 

ciacol5In te la Seconda Guera come che tuti saven, al campanil e la cesa vecia de San Lorenzo i é stati bombardadi dai Americani. Al prete de Pianzan de chei ani l'era un fià canaja e l'à pensà de far su na cesa nova invenze de ricuperar quela vecia, però no l'avea al posto dove farla su. Alora al ghe à domandà ala parona del camp de patate dove che ades ghe n'é la cesa nova: "Signor, disela che po' se qua invenze de vegner su patate vegnese su na cesa?" Cusita la fameja che la era parona de quel camp la ghe à donà al camp ala parochia e l'é grazie a sto ato de generosità che ades la cesa de Pianzan la se trova proprio là.

 

 LA TROTA

 ciacol6Rento  par via Codolo che la porta da Baver a S. Fior de sote ghe n'é al famoso "Pont dela trota" (in figura), ciamà cusita parchè in te un zerto periodo dei ani '80 in tel Pandin, al fosal che ghe pasa sote ghe n'era na trota che de cusì grande no so ghe ne vea mai viste. Comunque gnanca da quela volta no se ghe ne a pi viste de compagne e se volé saverla tuta no se ghe ne vedarà pi. Stà trota la andea spes e volintiera a riposarse a l'ombria sote sto pont e le par via de sta roba che al pont le stat ciamà cusì. I rivea da tute le bande par provar a pescarla; de sabo e de domenega ghe ne rivea tute le setimane almanco zinque coriere piene. In tea treni che rivea a Pianzan ghe n'era cusi tanti che i stea streti come le sardele e in te quei che partisea da Pianzan i tegnea sempre un vagon vodo in caso che i ghe la fese a ciaparla . Comunque nessun nol ghe la mai fata e la trota dopo un poc de temp che la e stata là la e andata via e no se la a pi vista.

 

 AL VERO MAZZARIOL

 

mazarolSul mazzariol l’e stat scrit centenari de libri e centenari de raconti, i lo conosce in tut al Veneto e ‘l Friuli, ma ve assicuren da ciacole sicure che al vero Mazzariol al sta a Pianzan.

L’e solche da definir se al stae a Levada o Baver: l’e veci pronti a giurar de verlo vist in medo ai camp dela Levada preso i fos e le risorgive drento par via Campanele o via par de la, dove che l'e la fossa rossa. Bisogna dir però a onor del vero che l’e anca chi che giura de esser stat perseguità dal Mazzariol che ogni not al se dea da far par ingatiar le caveze dele vache e dei cavai in tele stale. Adiritura sempre a Pianzan, al Mazzariol al ndea anca drento le case a tirarghe i piè dei tosatei scondesti sote ai pajon.

Da tute ste testimonianze sicure nessun pol meter in dubio che a Pianzan ghe sia davero al Mazzariol!

 AL GAT SENZA 'NA ZATA

 Se nol avese vist coi me oci no ghe varie credest tant a sta storia epura pose garantir che l’e pura verità.

Drio l’Asilo stea na veceta che l’avea un gat roso de quei che te ghen vede tanti in giro, un dì sto pore gat al se a ciapà rento con na zata sula rete de fero che fea da recinzion ala casa: destirà e impaurì al se movea come che ‘l fusse indemonià, ma la zata no la vegnea via. Sta pore vecia no la savea proprio come far, se la se vizinea la se ciapea un grun de sgrafade, co la scoa e coi bachet no l’era riusida lo stes a liberarlo…alora l’ha pensà ben de…TAJARGHE LA GAMBA AL GAT!

Sì, sì! Senza perderse de animo, l’ha ciapà la forvese par la lata e zacchete via la gamba!

Figureve al gat! I conta che al sie partì come un razzo e l’abbie attraversà a temp de record tut al camp sportivo…e co na zata in manco!

 BRIVIDI A BAVER

 Qualche vecio ancora se ricorda che 'na volta i disea che ghe era fantasmi sula vila de Baver, 'sta vila la e sempre stata misteriosa a scuminziar dal fato che nessun sa ben chi che l'ha fata su, se sa sol che a un certo punto la fameja De Marchi l'era parona, ma esendo siori no le che i se fese veder spes.

La storia dei fantasmi forse le legada ad un fat strano suces tanti ani fa che ades ve conte.

LEVADA8Nel giugno del 1810 Maria che la abitea probabilmente in te la vila la more improvisamente co tuti i sintomi de un avelenamento, fato sta che su sta vila abitea anca na femena, Orsola, che i disea essere mata da sempre e che dopo 9 ani la se a butà do dal balcon morendo sul colpo, granda impresion ha fat sto evento, anca sui so parenti parchè dopo poc 'na so cognada che la spetea un fiol l'à avu un aborto (forse per l'impresion de sti fati?). Dopo ste morti strane le fameie che abitea là le ha abandona sta vila.

In tempi recenti la vila l'e anca stata usada come deposito de bare.

 LA VACA LIGADA SUE SBARE

Ancora i conta che 'na volta un contadin che 'l portea 'na vaca par la caveza l'e stat sorpreso dale sbare mentre che l'andea verso la basa: confidando che volea un tochetin parchè pasese al treno, l'a ligà la vaca la sbara e le 'ndat a farse 'na ombra al bar ala stazione.

Cicola ciacola i a tirà su le sbare mentre che la vaca la era ancora ligada, anzi i dis proprio che la vaca la sie stata tirada su dal sbare!

Figurarse!

LE GRAZIE DELA MADONA DE LEVADA

Questa l'e na storia de devozion, fede e speranza che liga la dent de la Levada co la so Madona, come che saven a inizio del secol scorso a Pianzan i a fat un voto ala Madona par la tempesta e qualche ano dopo quei de la Levada i a scuminzià a far su 'na cesa dedicada ala Madona ausilio dei cristiani, co la guera in medo ghe a volest ani par finir l'opera e tanti sacrifici, ma in tel '23 i a podest inaugurar 'sta cesa e rinovar al voto ogni ano (fin des!).

Ben, da chela volta de tempesta che destira ua e panoce no ghe n'e pi stat in te la borgata, anzi, altre grazie le se ha somà a questa, una dele pì grose ancora i la conta.

LEVADA7Una grazia sicura co tenti testimoni l'e sucesa intorno al 1945, alora la Teresina Stival l'era stata operada de apendicite, ma qualcosa l'era andat stort tant che ghe iolea la gamba e no la podea pì caminar se no strasinada da do persone co tanto tormento. Se vizinea la data del 10 giugno co la fameja ricordea so pore popà, in te quea ocasion la ghe tegnea a andar a messa cussì la se a fat jutar par rivar in cesa. Là l'ha pregà tant e piandest tant sia par la sofferenza sia parchè ormai la se vedea inferma e pensar che la dovea sposarse...Improvisamente la se a sentì guarir e le gambe non le fea pì mal, le parea justade! Alora la se a mes a urlar dala felicità e a ringraziar la Madona par la grazia: tuta la fameja che l'era là in cesa l'era spasemada dall'emozion e parfin dall'osteria dela Teresina i e coresti a veder cossa che l'era succes tut sto trambusto.

Do ani dopo la se ha sposà e l'a avù un tosatel, l'e morta a 88 ani nel 2012 in Uruguai.

Se nde in sacrestia vedè quanti ex-voto che ghe n'e, tuta dent che ha ricevù grazie par intercession de la Madona e so de par certo che anca al di de incò l'e stat dontà ex-voto novi. Par altro, 'na volta esistea ancha ex-voto de oro (colane, anei, bracialet) che però i li ha vendesti al prete co se a tratà de far su la cesa nova.

 AL MORER DELA DISCORDIA

In tei ani 20 del secol scorso l'e rivà in Levada un bel grupo de fameje per lavorar la tera de quei posti che non l'era mai stata sfrutada fin in fondo, ai Stival vegnesti fora da Collalto 50 ani prima se donta ste fameje che le vegnea da Montaner e dintorni.

Noantri se vea un raporto stret coi paesi vizin a Sarmede e Montaner parchè se se scambiea la farina de forment co la farina de castagne a pari peso, cussì omeni e femene i se conosea e nasea storie d'amor incrosade.

Co i e rivadi, un dei caporioni l'a paintà un morer su un zerto punto che ades l'e deventà grando e gros e al richiede spes de esser zarpì e de esser curà.

Al fato l'e che sta pore pianta la casca in medo a mi no so quanti confin e l'e un grun de fameje che ghen rivendica la proprietà par un fato de principio, no zerto de valor! L'e chi che vanta testimonianze e ricordi dei veci, chi testamenti, chi mappe, l'e 'na roba da no creder se non se conose al fato.

Ogni ano, caschese al mondo, co se trata de zarpirlo scuminzia le manovre parchè tuti vol farlo, ma nesun vol farlo e chi che vol farlo vol farlo a la so maniera che l'e l'unica giusta.

Co un ciapa coraio e monta sul morer coa sega vien fora al casin, tuti i salta fora de casa vantando al proprietà, al dirito de tajar e la giusta maniera par farlo, co le imancabili minace de tajarlo do da dabas, sto simpatico teatro (parchè ala fine no l'e mai 'na vera barufa) no manca i vizini, anca quei che no c'entra gnent i se presenta par dir la soa e discuter co un e co l'altro par inderegar ancora de pì al vesper.

 

Co l'e finì i lavori tuti i torna amighi come prima (pì o meno).

 AL PARACADUTE DE SEDA

In tela seconda guera mondial co vegnea do un paracadutista l'era 'na grazia miga da poc, par via del paracadute.

A chei tempi al paracadute l'era fat de seda, roba preziosa come se caschese oro dal ciel, ogni ritaglio del paracadute che 'l vegnea infariabilmente ciavà al servia par far de tut, specialmente roba par la cesa: a Levada l'e ancora un conopeo (niziolet chel querde al tabernacol)  e altri paramenti de cesa fati co la seda del paracadute e ricamà dale tose dela borgata.

0051

STRIGHE

Come in tuti i paesi vien fora anca qua le ciacole sue strighe, specie 'na volata: sarie dele vecie che le trafichea co le erbe par far intrugli o le butea al malocio a qualchedun co strani riti coe piume dele bestie, anca co resi tosatei l'era ste ciacole, anzi, i disea che sul Pramui l'era l'ultima striga coi cavei tuti rufadi e se 'ndea in bicicleta a curiosar.

Al di de incò de par zerto, alcune vece le pica ancora fora dela porta al mazet dele 7 erbe par tegner lontan al diavol e i malefici.

CIAMAR DEMONI E DIAOI

Altra desgrazia dei giorni nostri l'e i riti satanici e mese nere che qualche ano fa qualche masnada che no se sa, i fea in zimitero.

I dis che 'na volta i epie fat in zimitero a Pianzan le robe in grando co tant de sacrificio de bestie sue tombe e sangue da par tut, un gran casin che al comun ghe a tocà serar al zimitero par 'na matina e ciamar al prete par riparar al sacrilegio.

RICAMO IN SOGNO

0045
La cota che vedè in tela foto (al di de incò no se usa pì le cote, e le usea zerte volte in cesa) l'e stata fata prima de la guera e ricamada da 'na vecia, la siora Stella co un ricamo cussì rafinato, cussì complicato e cussì bel che sol vedendola dal vivo in te la cesa de Levada se pol capir quel che ho dita.

Pasa i ani e un di al prete par sbaglio al ghe peta drento co la manega su 'na candela e in medo minuto la manega ricamada la va in fun: doppia desgrazia, la siora che vea fat al ricamo la era ormai morta.

L'unica che podea provar a justarlo l'era 'na dovena Adelina, ma par quant che la provesse e la studiese al sistema dela manega restada bona no l'era verso de vegnerghen fora.

'Na not la siora Stella la ghe a vegnest in sogno all'Adelina spiegandoghe la maniera de rifar al ricamo: deto-fato, al di dopo l'a scuminzià a rifar la manega col ricamo segreto.

FONDAZIONE DE LA CESA DE S.URBAN

 

S.Urban

La ceseta de s.Urban se a sempre savest che la podaria esser stata una de le pì vece del paese, del comun, in te sti ani l'e stat fat un studio sui muri e su le fonde, ades saven quasi de par zerto che l'e de epoca longobarda quindi prima del 1000 e speren che da qua a poc se posse anca recuperarla un sciant parchè ormai la sta su sol par miracol. Vutu che in te sta epoca de benes no sene gnanca boni di justarla come che se deve?

Alora, visto che nessun sa come e parchè i la fata su proprio là tanti storici (i dis lori de esser storici) i se a buttà co un grun de fantasie.

UrbanoIIpapa
Una l'e quea che la ceseta la sie stata fata su in tel XII secolo in memoria de papa Urbano II che al varie indetto le crociate: al de la del fato che no l'e gnent da festegiar in te na crociata figurate se a Pianzan in tel 1200 i savea qualcosa de crociate, i ghen varà sentist parlar
trecento ani dopo se va ben e po volendo far i professori Urbano II no l'ha indetto nessuna crociata (G. Vitolo, Medioevo. I caratteri originali di un'età di transizione, Sansoni, 2000, pp. 318-319.). Ste robe i le scrivea su veci libri de storia, ades saven che sto pore papa no l'avea nessuna intenzion de inderegarse su co le guere, anzi l'era un pacifista, andè a lederve la so vera storia!

 

CavalieriNo basta, in tel 1600 ghe n'era un storico che siccome nol vea grossa passion de far ricerca l'ha pensà ben de inventarse mede robe par render i so libri pì bei (anca inco ghe ne quei che.....speta che tase) secondo lu ghe sarie stat un combatiomento de cavalieri (in in tel 1100) in zona e par festeggiar la vittoria i varie fat su la ceseta de s. Urban...mah!

 

 LA DIFESA DELL'AVV. RIGATO

In tel dopoguera l'era 'na forte contraposizion tra comunisti e democristiani par via dela politica e da 'na parte e da l'altra i le provea de tute par strasinarte a votar da la so banda. Una dele storie pì strane che ho sentì l'e questa: alcuni dea DC par convinzer la dent a votar par la so parte i ghe disea: "Vota DC cussì co te mor l'avvocato Rigato al te difende davanti a nostro Signor".

L'avvocato Rigato l'era un importante politico e avvocato de Biban mort un grun de ani fa...figurarse se al Signor al se lasa inzhinghenar su dai avocati!!! Ma a quei tempi la dent la era sempliciota e l'avea tanta paura de finir a l'inferno...