Festeggiamenti de SAN BIASI par sto ano

         

Baver e le so tradizion

Baver l’é ‘l borgo tra i pì veci de tuta Pianzan e ‘l ciapa rento anca a ceseta de San Biasi, che a so volta l’é a cesa consacrada pi vecia del paese; l’é stata fata su poc dopo al 1000, forse in tel 1100-1200 vizin aa strada romana che a portea da Oderzo a Zeneda. Rento la à afreschi del secol milezinquezento e anca na pala dea fine del secol mileotozento fata dal famoso pitor Demetrio D’Alpago e che a rapresenta proprio ‘l santo.

San Biasi l’era un vescovo che l’à vivest in tel prinzipio del quarto secol in tea part pi a est dea Turchia, che a era ciapada rento in te l’impero romano; a esser pi precisi al stea in tea cità de Sebaste, che al dì de incό a se ciama Sivas. L’era bastanza bravo a guarir a dent dae malatie, parea squasi che ‘l fusse come un dotor dei ani nostri; però, come che l’era bravo coi cristiani, al se a cavea puito anca a guarir e bestie e a farle deventar mesteghe da selvareghe che le era. A conferma de sta roba, pararie che un colpo l’epie parfin convinto un lupo a tornarghe dar un porzelet che ‘l ghe vea portà via a na pore femena che a quel punto no a savea pi come far par darghe da magnar aa so fameia. Par scamparghe ae persecuzion contro i cristiani, a San Biasi ghe vea tocà anca quea de ‘ndar a star rento in te na grota, un poc de temp dopo però l’é stat mes in preson e l’é stat anca torturà ‘l vea avù coraio de ‘ndar a predicar davanti al governator romano de quea zona. In te quel che l’era in preson un colpo i ghe à portà là na mare col so bocia che l’era drio sofegarse parché ghe vea restà un spin de pes rento in tel gargat dea gola; grazie a lu ‘l bocia l’é riussio a salvarse, e l’é par via de sta roba che ades San Biasi ‘l vien venerà da tuti come protetor dea gola. In te l’ano 316 però, intant che l’era su a comandar l’imperator Licinio, San Biasi l’é stat marturidà e ghe à tocà morir proprio malamente; penseve che i à ciot parfin i peten che i doperea quei che i fea ‘l mistier de sgarbir a lana par sbregarghe a carne. A legenda a dis che dopo mort al sie stat portà su in cel diretamente dai angei. Acausa del so martirio tremendo e del sistema che i à doperà par farlo morir, al vien considerà ‘l patrono dei sgarbidori de lana; anca i contadini però i o venera e i o prega come so protetor, visto quant che ‘l ghe voea ben aa natura e ae bestie.

L’é da sie secoi che ‘l 3 de febraio a Baver se fa festa par San Biasi: Vien dita su a messa e ghe partecipa cussita tanta dent che i pi tanti i resta fora in tel cortio da tant piena che l’é a ceseta. Finida a funzion ghe n’é a benedizion dea gola, che a vien fata co l’imposizion de do candee benedete e incrosade proprio davanti al col de ogni persona; e candee che e vien doperade le é state benedete proprio ‘l dì prima, visto che ‘l do de febraio l’é ‘l dì dae Zeriola.

SanBisi1
Paa benedizion a dent da sempre a usa portarse drio dae roba da magnar che cussita a vien benedeta insieme aa persona che ‘l se l’à portada; na volta de soito i portea pan, pon, ua o vin, praticamente i prodoti dae tera, ades inveze se usa portar caramee. Cussita, se a qualchedun ghe fusse vegnest o ghe vegnesse ‘l mal de gola in tel resto de l’ano, al podea o ‘l pol farseo passar magnando de ste robe benedete qua. Proprio da un per de ani l'e stat reintrodot l'uso de far al pan de San Biasi.

A festa però no a finisse cussita ma a continua anca dopo a messa e fora daa ceseta. Penseve che un bel pochi de ani fa e comunque fin ai ani otanta del secol pena passà, paa festa de San Biasi a Baver i fea proprio na sagra co un bel capanon e co i sonadori, in modo che a dent a podesse balar; e po’ ‘l dì de San Biasi ghe n’era un bel poche de bancaree che e ciapea tute do e parti dea strada che a passa par Baver. De sicuro par un o do ani i à da ver organizà anca e corse dee machine in te un camp de tera; ste corse e ‘ndea bastanza de moda in te quel periodo là e e se ciamea “cingane”. Ades a festa che se fa no l’é pi cussita granda e a dura solche paa dornada del 3 de febraio, ma in compenso l’é tant pi tradizional: praticamente vien parecià un poche de toe in tel cortio dea ceseta e quande che a benedizion dea gola la é finida vien portà fora vassoi e sora vassoi de crostoi (infati, par quant bassa che a sie a Pasqua, San Biasi ‘l casca sempre soto carneval) e carafe de vin brulè e de tè caldo.

SanBisi2
Insoma ghe n’é da magnar e da bever par tuti quanti, e co se parla de tuti quanti se intende proprio na bea fraca de gente, visto che ghe n’é tanti che i vien anca da fora paese par partecipar a sta festa. A farghe da contorno a tut quant ghe n’é anca a musica sonada da veci sonadori de banda o de fanfara, che par l’ocasion i se mete dacordo e i riva da lontan e da vizin in modo da poderse tornar catar ogni ano. No bisogna desmentegarse però che comunque soto tuta sta bea festa, dove che a dent a passa un poc de temp in compagnia a ciacolar e a rider e scherzar, ghe n’é ‘l lavoro de tuta a dent del borgo, che a domenega prima dea festa a se trova in Levada aa sede del Godega Basket a far crostoi par tut al dì e come se no bastesse a se mete a disposizion par dar na man anca in tel dì stesso de San Biasi. Se a festa de San Biasi la é come che tuti a veden ogni ano alora bisogna ringraziar tute ste persone, e par primo bisogna dirghe grazie al sior Ugo Dal Cin, al paron dea ceseta e del teren atorno, che l’é sempre pronto a meterli a disposizion de tuti parchè se posse continuar a mantegner sta gran bea tradizion.

SanBisi3

Tornando al discorso del balo, qua a Bavere l'era al posto pì importante par balar e quindi conoserse tra morosi, 'na olta però ai tempi de don Possamai l'era considerà pecà balar e don Possamai steso a l'avea su a morte coi balerini e le a provade tute par fermar sta sagra: un ano l'a minacià de "scomunicar" la dent, un ano l'a fat dir mesa presto la matina, un ano l'a minacià de no far dir mesa, un ano l'ha adiritura mos i politici par far far 'na ordinanza comunale de divieto de balo, figurarse!

Un ano l'e stata bela: don Possamai no al ghe a dat la comunion a un poche de tose che vea balà figureve al casin: i parenti i se a mes a minacciar al prete, a dir un grun de parolate, a minaciar anca de far 'na festa da balo in tela cesa de San Lorenz, pararia che al prete al se sie baricà in sacrestia dopo i animi i se a calmà e tut se a justà.

Le foto che trovè que le e state concesse gentilmente dall'associazione de Baver, andè a visitar al sito soo che trovè tante robe interesanti: www.baver.it   

  

Sagra de Baver

Qua soto la foto de grupo de alcuni dei organizatori storici durante la festa in istà

Bav.Fe1

      

Bav.Fe8

Bav.Fe2

I sonadori a Baver!

     

Bav.Fe3

                          

 Bav.Fe4

 

Carneval a Baver

Visto che la festa de san Biasi casca de carneval, in tei ani '80 se fea anca i cari mascheradi che i vegnea fin da fora e i era tant pì bei de quei de ades. I conta che 'na volta un pochi de tosatei i e andadio dentro in cesa par la benedizion del la gola vestidi in maschera e don Benvenuto l'e andat fora de lu' e lì a mandadi fora de corsa!!!

Bav.C1 Bav.C2
Bav.C3 Bav.C4

             

 

I cavai a Baver

Sembre in occasion de san Biasi par qualche ano se 'a fat anca la sfilata dei cavai co costumi d'epoca.      

Bav.Cav1

     

 Bav.Cav2

  

Bav.Cav3

    

Bav.Cav4

 

 

Le gare dei curidori a Baver e feste in istà

Par un per de staion in tei ani '80 la C.S. Pianzano l'a organizzà 'na picola corsa de curidori na Baver in occasion dei festeggiamenti in primavera e istà, qua sote le foto dela corsa e del borgo in festa.

Bav.Fe5

      

 Bav.Fe7