L'ARNERA

Ontano11L’arnera l’é un albero che ‘l cresse ben in tei posti umidi e dove che l’é tanta aqua, l’é par quel che ghe n’é tante che e vien su in tee ziese che le é drio i fossai; a se adata ben al fredo e anca a ogni tipo de teren. E foie le à na forma oval, al contorno tut capetà e in autuno e casca do; a scorza l’é un fiantin ruvida, visto che la à picoi segni par travers del tronco e dei ran, e la à un color griso lucido. I fiori dei mas-ci e quei dee femene i é diferenti, comunque i vien fora sue ponte dei ran in primavera. Al legno l’é forte e ‘l tien puito e infati ‘l vegnea doperà par far su tante robe, ma sopratuto pae rode dei muin, visto che ‘l se rinforza ancora de pi a star in te l’aqua; par al stesso motivo al vegnea doperà anca par far su barche, ma quande che l’é sec al va benon anca par brusar. Ontano1A specie che a cresse qua da noi l’é l’arnera rossa o comun, che a vien ciamada anca arnera de fossal. Na volta i pensea che a fusse un albero maedeto parché dopo poc che ‘l vien taià al legno ‘l se ossida suito e ‘l deventa rosso come che ‘l sie insanguanà; ani fa se doperea tant al modo de dir “’ndar a dormir sote e arnere” par dir che se ‘ndea a dormir de fora.

 

A CASSIA

 aca1
A cassia l’é un albero che l’é stat portà qua da noi daa part pi alta dea Merica in tel 1615 e che in tel giro de poc temp al se à difondest un fià dapartut fora che su pae montagne; a cresse bastanza aa svelta su tute e sort de teren, e sopratuto in te quei pi umidi. Al so sistema de radis al riesse a tegner ben compatada a tera e par via de sta roba a cassia a va benon par tegner tacade part de tera che e ris-cia de franar o che le é poc stabii; in primavera comunque e radis e buta su un disastro de germogli, l’é par questo che sto albero al riesse a difonderse cussì aa svelta. A scorza l’é tuta ruvida e screpolada e i ran i é pieni de spin che i spuncia bastanza; e foie le é picenine, lisse da tute e do e bande, e à na forma oval, e finisse co na picola ponta e e vien fora tute insieme su dei ramet verdi. A cassia a fiorisse in maio e i so fiori bianchi i vien fora a rap; ancora ades se usa cior su sti fiori par friderli dopo verli tociadi in te na pastea: vien fora na specie de fritoe che le é veramente bone. Al legno l’é de un color dal che ‘l tira al verdo, l’é dur e ‘l tien bastanza puito in tel temp; par via de sta roba al vegnea doperà spes dai marangon ma anca dai contadin par farse dent pai restei, scain pae scae de legno, pichet da piantar par tera e pai. Quande che i taiea do cassie par far pai da doperar par tegner su i vigneti, dopo che i vea segà i tronc a misura i usea butarli rento in te l’aqua dei fossai par un zerto periodo, parché cussita ‘l legno ‘l deventa ancora pi forte; al legno de cassia comunque ‘l va benon anca par arder. aca2
Quande che na cassia a more o a vien taiada do, squasi sempre in te l’autuno drio dal bas del tronco o sua zoca vien fora bei baret de ciodin, che i é fonghi davero boni. Na volta se doperea bastanza spes al modo de dir “cresser fa na cassia in aqua” che ‘l servisea par parlar de qualcossa o de qualchedun che ‘l vea fat proprio na gran cressesta in tel giro de poc temp.

 

AL FAGHER

 faggioAl fagher l’é un albero che ‘l cresse benon in coina e in montagna, ma se pol trovarlo anca in tee nostre ziese; al resiste ben al fredo e a l’ombria del posterno, però al podarie patir se capita via ingelade fora staion in primavera. Al cresse puito su tuti i tipi de teren e co l’é ben svilupà in genere ‘l tronc l’é proprio bel gros; a scorza l’é lissa e de tinta grisa, i ran pi doveni inveze i à na specie de pel che ghe vien fora. E foie le é de color verdo scuro e in autuno e casca do; le à na forme oval e le é un fia pi lucide daa parte par sora e un fià pi ciare daa parte par soto. Al fruto l’é de legno, l’é pien de spin atorno e ‘l tien rento do tre semenze; da ste semenze se podarie cavar fora anca oio bastanza bon. Al contrario del tronc, i ran in genere no i é pi de tant grossi; al legno comunque l’é dur e pesante, e na volta ‘l vegnea doperà par far tante impreste e anca par far i magon dee careghe, dei cari, dee carioe e dee scae, par farse i zocoi e anca pai doghi dei bo. faggiofoglia
Al fagher al dì de incó al vien doperà spes anca par esser piantà in tei giardin, dove che ‘l fa anca na gran bea figura.

 

AL FRASSEN

 frassinoAl frassen l’é un albero che ‘l cresse meio in tei teren pi grassi e fertii, se ‘l cata spes in tei bosc e ogni tant anca in tee nostre ziese; a so scorza l’é bastanza lissa e pene pena screpolada sul tronc, e pi lucida sui ran. E foie le é bastanza fine e e finisse a ponta; le à ‘l contorno tut fat a dent e le é lisse daa parte par sora e un s-ciant peose par soto. E pol esser doperade anca par darghee da magnar ae bestie e come paa cassia e vien fora tute isieme su dei ramet verdi; in autuno comunque e casca do par tera. Sto albero al fiorisse tra april e maio prima che vegne fora e foie; i fiori i é de color a meda via tra ‘l dal e ‘l verdo e i vien fora a rapet sue ponte dei ran. Al legno l’à na tinta tra ‘l bianco e ‘l rosa, al pol esser lavorà co comodo visto che l’é senza grop e ‘l vien doperà par far tante robe.

 

Frassino jpg
Na volta col legno de frassen, come che col legno de fagher, se fea i magon o i travers dee careghe, dei cari e dei caret e anca i doghi par e bestie. Anca i frassen ades i vien doperadi par far pi bei i giardin.

 

AL MORER

 MorusAl morer l’é un albero che ‘l cresse un fià su tuti i teren, ma ‘l sta meio su quei pi freschi e su quei bei profondi; a so scorza l’é bea grossa e anca tant screpolada e i ran quande che i vien taiadi i buta fora na specie de sostanza bianca che a ghe someia al lat. E foie e à a forma de cuor, al contorno capetà e e casca do in autuno. Al fruto l’é de color nero o bianco, l’é dolz e ‘l ghe someia a na mora; al pol esser magnà senza problemi e adiritura se pol doperarlo par far dei sirop. E foie dea specie del morer rosso na volta e vegnea ciote su par darghee da magner ai cavalier, che i sarie gnent altro che i bachi da seda. Sta qua na volta l’era na atività che a rendea puito , cussita i morer i vegnea piantadi un fià dapartut dove che l’era posto; anca par tegner su i vigneti in te quei ani là no se doperea pi pai de legno de cassia o de olmo, ma se impiantea i morer che oltretut i vegnea su anca bei dreti. morus-alba
I “morer dee aneme” inveze i era quei che i vegnea piantadi su teren che no i vegnea lavoradi o su posti de proprietà publica e che i ghe vegnea assadi aa dent pi poreta in modo che anca sta qua a podesse guadagnar qualcosseta slevando i cavalier; sta roba qua vol dir che na volta, anca se tuti quanti i vea manco de ades, i era tuti quanti tant pi disposti de ades a darghe na man a chi che vea bisogno. Anca ‘l morer al dì de incó al vien piantà spes in tei giardin come albero da beeza.

 

L'OBOL

acerocampestre

L’obol l’é un albero che no ‘l cresse tant aa svelta, ma che ‘l buta fora tanti germogli sia dae radis che dal tronco; a scorza la é tuta ruvida e screpolada e i ran doveni che i buta i par squasi fati de sughero. E foie e casca in autuno e le à na forma che no l’é par gnent regolare; i fiori i é de color verdo e i vien fora in maio. Al legno l’é bianco e anca bastanza rizercà, visto che se pol lavorarlo e lucidarlo proprio benon; par via de sta roba ‘l vien doperà tant dai faegnami, però l’é anca bon par far a carta e anca par esser brusà.

foglie acero_campestre
Ani fa i oboi i vegnea fati cresser in tei vigneti parché i tegnesse su e vide e ‘l so legno ‘l vegnea doperà par far i maneghi dee impreste da lavoro, par far i as, i magon e i timon dei cari, par farse i zocoi e anca par far doghi pai bo; i boce inveze i se godea un disastro parché i doperea i ran de sto albero par farse e forcassee dee fionde.

 

L'OLMO

ulmusL’olmo l’é un albero che l’à a scorza ruvida e ben fessurada sul tronco, che a par fata de sughero sui ran de meda via e che l’é proprio lissa sui ramet pi picoi; e foie le é de forma oval, col pecol curt e col contorno fat a dent. I fiori i é rossi e i é ragrupadi in picoi mazet; anca ‘l legno ‘l tende a esser ros e l’é bon da arder. Tanti ani fa sto albero l’era tant sfrutà in tea vita contadina, infati al vegnea piantà sui vigneti par darghe sostegno ae vide, e so foie e vegnea ciote su par darghee da magnar ae bestie e ‘l so legno ‘l vegnea doperà par far tante robe, come i magon dee careghe, i zocoi, i timon dei car e i doghi pai bo. Oltretut, come che se fea coe cassie, anca sti alberi qua i vegnea taiadi par far i pai che i tegnea su i vigneti, e anca i pai de sto legno i vegnea butadi rento in te l’aqua de un fossal in maniera che i se rinforzesse prima de esser messi su par sostegno.  

Ulmus2
Na roba particolar che a vegnea fata l’era i archi dei restei che, se i era de legno de olmo, no i se fessurea e no i se spachea mai quande che ghe vegnea fat i bus par meter rento i dent.

AL PLATEN

 Platanus11Al platen l’é un albero davero grando che no ‘l manca rento e nostre ziese ma che tuti quanti forse sen pi bituadi a veder drio e strade dee nostre zone, visto che ani fa se usea piantar solche alberi de sta quaità qua par far pi bee e par far un poca de ombria sue vie principai de un fià tuti i paesi. La scorza la é de un color tra ‘l griso e ‘l maron e col temp la à a tendenza de destacarse e de vegner via a strati bastanza fini; e foie le é bee grande e le à na forma che no l’é regolare, e so nervadure le é bee grosse e ‘l contorno l’é un s-ciant fat a dent. Sempre parlando dee foie, bisogna dir anca che le à ‘l pecol bel longo e che in autuno e casca do. I fiori i é dai e i vien fora a s-ciapet, i fruti inveze i é come dee picoe baete che le é fate de semenze peose tacade una co chealtra, anca sti qua i à ‘l pecol che l’é proprio bel longo.  

Platanus1
Al legno al vien doperà dai faegnami par far picoi lavoret, ma anca dai artigiani che i lavora ‘l legno par farghen vegner fora robete bee e da siori; comunque l’é bon anca da brusar. Sto albero al resiste puito a l’inquinamento e forse l’é proprio par via de sta roba che i à pensà de piantarghen cussì tanti in parte ae strade.

 

AL ROVER

 rove
Na volta ‘l rover l’era un  albero che ‘l dea na grossa man a far si che e nostre campagne e fusse veramente bee, ades inveze qua da gnoaltri se scuminzia a far fadiga a trovarlo; par vederghen un bel pochi infati bisogna che ‘ndene in tee zone de coina, de bassa montagna e in tee val dee Alpi e dee Prealpi. Al regna meio in tei posti bei freschi e suti, e l’à ‘l tronc bel dret. E foie le à ‘l contorno fat a cape bee grande e e casca do quande che scuminzia a rivar al fredo, e ghiande inveze le é bastanza grossete e e vien fora diretamente sui ran. Sto albero in genere al riesse a viver proprio par tant temp e ‘l so legno che l’é veramente bon al pol esser doperà per far un disastro de robe; al rover comunque al serve pi che altro par far mobii, no bisogna desmentegarse però che ‘l vien doperà anca par far e bot dove che se mete rento par assarli inveciar al vin e distilati de tute e sort.

rovere1
In te sti ultimi ani anca qua da gnoaltri va tant a moda inventada dai francesi de assar al vin par qualche ano rento in botesee picoe e particolari fate proprio de rover; ste botesee che i francesi i é ciama “baric” e ghe assa ‘l gusto del legno rento in tel vin, che cussita dopo l’inveciament al deventa ancora pi bon e ‘l vien ciamà “vin baricà”.

 

AL SAEZ

salixbabylonica
Al saez l’é un albero che no ‘l riva a esser tant alt e che ‘l se trova un fià dapartut in giro par l’Europa; al cresse meio su teren freschi e umidi visto che l’ama tant l’aqua, e l’é proprio par via de sta roba che se ghe n’vede un pochi rento pae ziese che e ghe va drio ai fossai. I ran i é bei longhi e se pol piegarli co gnent. E foie le é picenine e strete e co vien autuno e taca a cascar do, le à ‘l pecol picenin e ‘l contorno l’é pene pena fat a dentin; se pol dir anca che daa parte par sora le é bee lucide e de color verdo e che par soto inveze le é un s-ciantin peose e le à na tinta che a tira un fià pi sul griso. I ran freschi de sto albero tra a fine de l’autuno e ‘l prinzipio de l’inverno i vien taiadi do par far e sache, che e vien doperade in tea zarpidura dee vide: e sache pi grosse e vien doperade par ligar i tronchi dee vide ai pai o ai feri, quee pi fine inveze e serve par ligar ai feri i cavi che i vien voltadi do. salix babylonica

Par via de sta roba i saez no i vien solche assadi cresser in tee ziese, ma i vien anca piantadi in tei camp (in genere sue testade) dai contadini, che cussita i é sicuri de ver ogni ano un bon rifornimento de sache; e po’, par far si che ‘l taio dee sache no ‘l sie pi de tant indifizie de soito i saez i vien tegnesti bassi, in modo che ‘l lavoro al posse esser fat da par tera. 
Dai ran del saez comunque se pol otegner anca vimini par far zeste o altre robe. Na volta al legno del saez al vegnea doperà anca par far i maneghi dei restei; se fea cussì parché sto legno qua scorendo sua pel dee man al scaldea manco confronto a tuti chealtri.

 

AL TALPON

pioppo
L’é un albero che in genere al cresse bel alt e in tei posti pi umidi e pi freschi; al tronco a l’é un fià intorcolà e a scorza la é ruvida, co tante fessure, e la à un color tra ‘l griso e ‘l nero. E foie, che e casca do par tera in autuno, le à na forma oval, al contorno ‘n atimin fat a dent e le é lisse da tute do e bande; i fiori i vien fora prima dee foie e comunque quei dei mas-ci i é diferenti da quei dee femene. Al talpon al cresse da sol sue ziese che e ghe va drio ai fossai o dove che ghe n’é aqua, e in primavera al buta fora anca na specie de lanuz; al so legno l’é tenero e no l’é par gnent de bona quaità, cussita ‘l vien doperà par cavarghe fora a celulosa par far a carta. Na volta i talpon che i era piantadi vizin ae case i servisea anca come rifugio natural pae faraone, e comunque sto tipo de alberi, grazie sopratuto aa fraca de foie che i se ritrova a ver su pai ran, l’à sempre ospità e l’ospitarà ancora i nit de tante sort de osei, e specialmente quei dee gaze ladre. Ghe n’é tanti modi de dir che i menzona ‘l nome de sto albero e varda caso in squasi tuti se tende a parlar mal de qualcossa o de qualchedun; forse l’é anca parché, come che a fa spes a cultura popolare, in te un zerto senso se vol zercar de far un paragon tra a scarsa quaità del so legno e i difeti dee persone o dee robe che se à intenzion de criticar. Par esempio, col modo de dir “Te se dur fa un talpon!” se ghe dis praticamente in facia a qualchedun che l’à proprio na testa da bater pai; co “Da un talpon no se cava zarese.” inveze se intende dir che dee volte se fa tanta fadiga par zercar de cambiar in meio n azerta situazion o a natura de qualchedun o de qualcossa.
pioppo11
Al proverbio “Co ‘l talpon al se vestisse al poltron al se despoia.” al vol dir che in tel periodo che ‘l talpon al mete e foie (bastanza tardi comunque confronto a chealtri alberi e a chealtre piante) chi che no l’é bituà a far gnent al se cava do a roba da inverno; cussita se vol dirghen quatro a quei che i lavora poc o comunque manco de chealtri. Par finir, col modo de dir “E raze no e va su pai talpon.” se intende che ogni fiol al ciapa da so pare e da so mare, e alora a raza, cioè al modo de far e de comportarse, al caratere, e quaità e i difeti de na persona no a va persa e in senso figurà no a va su pai talpon, ma a ghe vien trasmessa diretamente ai fioi; sto modo de dir insoma al vien doperà quande che se vede in modo ciaro che na persona a fa e stesse robe e a se comporta proprio come che fa o che fea i soi o un dei soi.